Llwyddiant i Ymgynghoriaeth Gwynedd yng Ngwobrau CIHT Cymru

Llun o Mitesh Solanki – Llywydd CIHT 2025-26, Hefin Lloyd-Davies – Jones Bros, Jamie Owen – Gwestwr, Robat Williams – Jones Bros, Cai Newell Jones – YGC, Dylan Erfyl Davies – YGC

Mae gwaith caled Ymgynghoriaeth Gwynedd (YGC) wedi ei gydnabod yn ddiweddar yng ngwobrau blynyddol CIHT Cymru (The Chartered Institution of Highways and Transportation).

Cafodd y Gwasanaeth lwyddiant drwy gipio Gwobr Teithio Llesol ar gyfer Cynllun Llwybr Cysylltiol Blaenau Ffestiniog i Chwarel Llechwedd A470 a Gwobr Arloesi ac Ymchwil ar gyfer Cynllun Adnewyddu A493 Friog i Lwyngwril.

Daeth y Cynllun Adnewyddu A493 Friog i Lwyngwril yn ail yn y categori Gwobr Cydweithio hefyd.

Mae’r Wobr Teithio Llesol yn cael ei dyfarnu i brosiectau i gydnabod pwysigrwydd teithio llesol wrth gyflawni buddion iechydol, cymdeithasol ac amgylcheddol i gymdeithas ac yn cydnabod cynlluniau cerdded a beicio trawsnewidiol a’u heffaith gymunedol.

Mae’r Wobr Arloesi ac Ymchwil yn cydnabod y camau ymchwilio a threialu sy’n cymryd lle wrth ddatblygu prosiectau.

Llun o Mitesh Solanki – Llywydd CIHT 2025-26, Robat Williams – Jones Bros, Jamie Owen – Gwestwr, Rebeca Seren Jones – Jones Bros, Gwynfor Hedd Roberts – YGC, Jill Jones – Asiant Cefnffyrdd Gogledd a Chanolbarth Cymru, Hefin Lloyd-Davies – Jones Bros, Rhys Jones – YGC

Dywedodd y Cynghorydd June Jones, Aelod Cabinet dros Priffyrdd, Peirianneg ac YGC:

“Llongyfarchiadau i staff YGC a phawb wnaeth gyrraedd rhestr fer y gwobrau nodedig yma. Mae’r prosiectau yma ym Mlaenau Ffestiniog a Friog i Llwyngwril wedi cyfrannu at ddatblygiad economaidd ac adfywio yn lleol, iechyd y cyhoedd, a chynaliadwyedd amgylcheddol.

“Mae’r llwyddiant yn y gwobrau yn newyddion calonogol, ac yn gydnabyddiaeth o arloesedd a’r cydweithio sy’n digwydd o fewn y Gwasanaeth YGC gyda phartneriaid fel Jones Bros a’r Safle Treftadaeth y Byd Tirwedd Llechi Gogledd Orllewin Cymru i gwblhau prosiectau o ansawdd o fewn ein cymunedau yma yng Ngwynedd. 

“Dyma hefyd atgyfnerthu ymrwymiad y Cyngor i Deithio Llesol, un o brosiectau Cynllun y Cyngor, a fydd yn y pendraw yn helpu i wella iechyd personol, ansawdd yr aer ac yn gwneud ein cymunedau yn lefydd dymunol i fyw a gweithio ynddynt.”

Roedd YGC yn cydweithio gyda’r contractwr Jones Bros Civil Engineering UK ar y prosiectau hyn.

Dywedodd cyfarwyddwr contractau Jones Bros, Hefin Lloyd-Davies: 

“Mae wedi bod yn wych gweithio’n agos gydag YGC i gyflawni prosiectau sydd wedi cael gymaint o effaith, ac rwy’n falch bod ein hymdrechion wedi cael eu cydnabod gan gorff sydd wedi’i hen sefydlu o fewn y diwydiant.

“Mae’r gwobrau sydd wedi’u hennill wirioneddol yn dyst i waith caled ein holl aelodau o staff ac yn adlewyrchu ein hymrwymiad parhaus i ragoriaeth a’r cydweithio gyda YGC.”

Am y diweddaraf am brosiectau YGC ewch i: www.ygc.cymru

I ddysgu mwy am Wobrau CIHT Cymru: CIHT Cymru Wales Awards | CIHT

Llun o Blaenau Ffestiniog

Nodiadau

Cynllun Llwybr Cysylltiol Blaenau Ffestiniog i Chwarel Llechwedd A470

Nod y prosiect hwn oedd gwella cysylltiad â diogelwch i gerddwyr a beicwyr rhwng tirwedd chwarel Llechwedd a Blaenau Ffestiniog, mae’r gwaith yn rhan o gynllun Llewyrch o’r Llechi – rhaglen fuddsoddi ddiwylliannol a ariennir gan Llywodraeth y DU ac a arweinir gan Gyngor Gwynedd sydd yn deillio o waith adfywio yn rhan o ddynodiad Safle Treftadaeth y Byd Tirwedd Llechi Gogledd Orllewin Cymru.

Prif nodweddion y prosiect oedd:

• Llwybr teithio llesol 1.3km ar gyfer cerddwyr, beicwyr a defnyddwyr cadeiriau olwyn
• Ynysoedd lloches i gerddwyr/beicwyr a lledu palmantau i wella diogelwch
• Gwelliannau amgylcheddol, gan gynnwys plannu 400 o goed a chreu cynefinoedd newydd
• Adeiladu cynaliadwy, gan ddefnyddio deunyddiau wedi’u hailgylchu a llafur lleol
• Lleihau tarfu drwy gwblhau gwaith yn raddol yn ystod y nos os angen

Cynllun Adnewyddu A493 Friog i Lwyngwril

Cafodd y prosiect gydnabyddiaeth gan CIHT Cymru am fynd i’r afael â heriau peirianyddol cymhleth gan gynnwys amodau tir gwan, lled ffyrdd cul, isadeiledd tanddaearol, a mynediad cyfyngedig i’r safle. Roedd datrysiad YGC i’r yn cynnwys:

• Lleihau tarfu ar ddefnyddwyr y ffordd a’r rheilffordd
• Dull gosod cyflym heb gloddio dwfn
• Diogelu isadeiledd tanddaearol
• Ehangu lled y ffordd o 200mm
• Cydymffurfiaeth â gofynion y ffordd a’r rheilffordd

Cwblhawyd y prosiect yn brydlon ac o fewn y gyllideb, gyda llai o effaith amgylcheddol ac amddiffyniad hirdymor gwell.

Am ragor o wybodaeth am waith YGC dilynwch y gwasanaeth ar Facebook, Instagram neu ewch draw i wefan y gwasanaeth https://ygc.cymru/